Manne koop ow toch 'n hundje
Manne, koop ow toch ’n hundje.
Manne a-j nog vri-jgezel bun, wil gi-j toch nog graag ’n vrouw,
Denk dan wel aan de gevaore, eûverleg ’t ow genau.
Laot ow niet te snel verleide, kiek toch niet naor elke kont,
Wil gi-j lève zonder zörge, koop ow liever dan ’n hond.
Refrein:
Luuster manne geleuf ons bei-je, blief wiet weg van al die wief,
koop ow liever maor ’n hundje, want die bun toch ook heel lief.
Nee ’n hundje kan niet huule, lus gin pa-ra-ce-ta-mol.
’s Aovends het-te ook nooit koppien, en d’r is um niks te dol.
Nee ’n hond den hoef zich ook nooit, op te dirke as ’n pauw.
En hij slup graag in zien blootje, vraog dat maor ’s aan ow vrouw.
Refrein:
Vrouwe wille naor de kapper, naor de schoonheidsspecialis.
Manne dat bun dure grappe, wet ie hoevol bier dat is.
Nee ’n hond den stelt gin eise, is tevrè-je met ’n mand.
Het gin pedicure neudig, is dus niet zo’n dure klant.
Refrein:
Loop ie dan met eur naor buute, blif ze schielek örges staon.
Lieve man, ik mot zo neudig, hol mien tas vas ik mot gaon.
Maor ’n hond het aan ’n boom zat, nee den kik niet zo genau.
Hij duut dan gewoon zien poot hoog, vraog dat maor ’s aan ow vrouw.
Refrein:
Wil ow vrouw ’n dag naor Arum, bu-j de auto al weer kwiet.
Mot hij weer naor de garage, ni-je bumpers dat is driet.
Nee ’n hond den kan niet ri-je, het de peut niet lang genoeg.
Ri-jd ow wage niet aan drelle, he-j geld eûver veur de kroeg.
Refrein:
Gaot gi-j ’s aovends naor de Dolle, en kom gi-j te laat in bed.
He-j nog heel wat uut te legge, ku-j vergète alle pret.
Maor had gi-j zo’n lief klein hundje, en bun gi-j weer vös te laat.
Ku-j de pret ook wel vergète, maor hij kwispelt met zien staart.
Refrein:
Wil gi-j graag ’s op vakantie, laot dan rustig den wau wau.
Bi-j ow beste vriend logere, doet dat maor ’s met ow vrouw.
Nee zo’n hond geet ow niet lope, umdat hij ow as baas erkent.
Bi-j ’n vrouw lig dat toch anders, onderwerping is eur vremp.
Refrein - (aangepaste tekst):
Mèèdjes ku-j ons nog vergève, wi-j bedoele ’t niet kwaod.
Zonder ollie zun wi-j ganiks, wette wi-j ons ga gin raod.
Zonder vrouwe is ’t lève, net as zuurkool zonder wos.
Nee ’n hond dat is niet alles, zonder vrouw zun wi-j de klos.
